Сапар Исаков КР Даниянын Элчиси Томас Винклер менен жолугушту

11:00 05.12.2017
Screenshot_15.png

Кечээ, 4-декабрда, Кыргыз Республикасынын Премьер-министри Сапар Исаков Кыргыз Республикасындагы Дания Королдугунун Атайын жана Ыйгарым укуктуу Элчиси Томас Винклерди кабыл алды. Бул тууралуу өкмөттүн аппаратынын коомчулук жана ЖМК менен байланышуу боюнча бөлүмү билдирди.

Даниянын Элчиси Томас Винклер Премьер-министрди президенттик шайлоонун ийгиликтүү өтүшү менен куттуктады: «Биз Кыргызстанда демократиялык, анын катарында адам укуктары жаатындагы өзгөрүүлөрдү байкап жатканыбызга абдан кубанычтабыз».

Сапар Исаков быйыл Кыргыз Республикасы менен Дания Королдугунун ортосундагы дипломатиялык мамилелерге 25 жыл толуп жатканын белгилеп кетти.

«Биз мамилелерибизди ар кандай тармактарда жигердүү өнүктүрүүбүз, анын ичинде жалпы жеңилдиктер тутумун (ВСП+) колдонуу менен өлкөлөр ортосундагы соода жүгүртүүнү өстүрүүбүз зарыл», – деди Өкмөт башчы.

Өз кезегинде Элчи Томас Винклер Дания саясий диалогду бекемдеп, бизнес жана маданият тармагын өнүктүрүү жаатындагы кызматташтыкты чыңдоого даяр экендигин баса белгиледи.

«Даниянын жалпы жеңилдиктер тутумунун техникалык аспекттерин окутуу боюнча жакшы тажрыйбасы бар жана биз кыргыз бизнесине аталган маселеде көмөк көрсөтүүгө даярбыз», – деди Элчи Томас Винклер.

Жолугушуунун жыйынтыгында тараптар «Таза Коом» санариптик трансформация боюнча улуттук программанын алкагындагы кызматташтыкты талкуулады.

Теги: Өкмөт, Иштешуу

Яндекс.Метрика